Radibor - Chronik

Srjedu, 06.05.2015 přijědźe skupina šulerjow z madźarskeho Kakásda, partnerskeje komuny Radworskeje gmejny, prěni raz do Łužicy. Z Radworskimi šulerjemi nazwučowachu woni madźarske a němske spěwy a reje, kotrež chcychu zjawnosći předstajić. Wobydlerjo Radworja a wokolnych wsow běchu tuž přeprošeni pjatk, 8. meje, wječor na zabawny program wyšeje šule „Dr. Marja Grólmusec“ a hosći z Kakásda do hosćenca „Meja“.
W narodnje měšanych porach pokazachu dźěći a młodostni, što běchu nawuknyli. Slědowachu spěwne a instrumentalne přinoški - zwuki huslow a cymbalow. Wosebje zahorjeny pak bě publikum při rejach madźarskich hosći. Sobotu podachu so šulerjo zaso z busom na dosć dołhi dompuć.