02.12.1906_brandjahr
Dies ist eine alte Version des Dokuments!
02.12.1906
| Wosmy woheń we wsy w běhu lěta | Der achte Brand im Ort im laufe des Jahres |
|---|---|
| W lěće 1906 je w Radworju 8 króć přez zapalerstwo woheń wudyrił a wulke škody načinił. Tu rozprawa ze Serbskich Nowin z dnja 08.12.1906: “Wosmy króć je so zańdźenu njedźelu (02.12.1906) rano w našej wsy paliło. Posledni čas na najenka tudomneje „herbskeje grychty„ Winkelmanna tukachu, zo w Radworju a wokolnosći zapaluje. Sobotu wječor běchu štyrjo žandarmojo do wsy přišli, zo bychu herbsku grychtu wobkedźbowali. Wjesni wobydlerjo na druhich městnach stražowachu, dokelž so powědašće, zo budźe zo sobotu zaso něhdźe palić. Njedźelu rano 3 hodźin so jedyn žandarm dohlada, zo so z jednoho kulojteho wokna w swislach wyše rejwanskeje žurle kur wuwaluje. Bórze po tym so płomjo přez třěchu předoby. Dwaj žandarmaj so z chěžnymi durjemi nutř dobyštaj. Korčmarjowa žona jimaj jenož k nuzy zwoblěkana z łoža napřećo přiběža, korčmarja pak zwoblěkaneho nadeńdźeštaj. Na łubi so na dwěmaj městnomaj paleše, a zo bě so woheń załožił, to sylna bencinowa wóń přeradźi, kotraž bě so po łubi rozlała. Z toho so wuswětlić hodźi, zo je so woheń tak skoku rozšěrił. Na hašenje njebě pomyslić. Rjane masiwne twarjenje, prjedy Polenkecom a nětkole twarcej mašinow Kindermannej w Budyšinje słušaca, so za krótki čas z płomjenjemi do cyła zapusći. Winkelmanna hnydom zajachu. Na njeho tukaju, so je tež wulku knježu pólnu bróžeń zapalił. Krótko prjedy hač je z njeje woheń wušoł, je wón nimo njeje z jězdnym kołom jěł. Winkelmann je 28 lět stary a po swěće daloko pobył. Kaž wón wudawaše, je wón w Abesynskej wyšk w tamnišim wójsku był. Hižo w jednej druhej wsy, w kotrejž je wón prjedy bydlił, je so wospjet paliło a su so tež tam na njeho hrěšili, zo woheń załožuje. — Ze zwonkownych sykawow Borančanska prěnja, Kamjenjanska druha a Łupjanska třeća na hašenje přijědźe.” Njedźiwajcy 28 swědkow njemóžachu jemu na sudniskich jednanjach winu jasnje dopokazać. Tohodla so z přepytowanskej jatby pusći… Wotpaliło je so: 1. 21.01.1906: Korčma Mikławša Delenka při kěrchowje 2. 01.04.1906: Mišnarjec korčma, wot Domanic wobhospodarjena, (dźensa “Meja”) 3. 07.08.1906: Bur-Šmitkec bróžeń, domske, Sćapanec bróžeń/hródźe 4. 17.09.1906: Nawkec bróžeń a hródź a fararjec hródźe 5. 21.10.1906: Słomjana fajma ryćerkubła 6. 09.11.1906: Pólna bróžeń ryćerkubła 7. 03.11. 1906: Winarjec bróžeń 8. 02.12.1906: Polenkec, potom Kindermanec korčma, Winkelmann bě jeje najenk! |
02.12.1906_brandjahr.1682181978.txt.gz · Zuletzt geändert: 2023/04/22 16:46 von admin
Seiten-Werkzeuge
Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: CC Attribution-Share Alike 4.0 International
