Radibor - Chronik

Dotalny wjesnjanosta Wincenc Baberška wostanje tež přichodne sydom lět w tutym zastojnstwje, kotrež hižo z lěta 1992 wukonja. Při wčerawšich wólbach wupraji so 94,9 procentow ludźi po wšej gmejnje za njeho. Wólbne wobdźělenje mjez cyłkownje 2 800 wólbokmanymi wučinješe přerěznje 43,9 procentow. Rozdźělne wólbne zadźerženje bě we wšelakich dźělach gmejny widźomne. Mjeztym zo dźěše w Radworju a Chelnje połojca wšěch wólbokmanych do wólbneho lokala, činješe tole w něhdyšej Minakałskej gmejnje, kotraž bu 1999 do Radworja zagmejnowana, jeno třećina. Tam bě tež přihłosowanje za Baberšku z 85 procentami najsnadniše. Porno tomu wupraji so w Radworju 97 procentow a w Chelnje samo 98,5 proc. za njeho. Mjez prěnimi gratulantami běštaj krajny rada Michał Harig a nawoda wjesneje skupiny CDU Hagen Wjacławk. Wonaj so zhromadnje z druhimi wjeseleštaj, zo je kandidat strony dosć hłosow dóstał. Wincencej Baberšce je wólbny wuslědk zdobom pohon, so dale za wobydlerjow zasadźować.

start………………………………2006