15.12.1932_n.sauer_gestorben
Dies ist eine alte Version des Dokuments!
15.12.1932
| Prelat Mikławš Žur - twarc Radworskeje cyrkwje - zemrěł | Nikolaus Sauer - der Erbauer der Radiborer Kirche - gestorben |
|---|---|
| Wysoko česćeny prelat Mikławš Žur, spiritus rector a twarc našeje wulkotneje Radworskeje wosadneje cyrkwje a 15 lět farar Radworski, je dnja 15.12.1932 w 74. lěće swojeho žiwjenja po dlěšej chorosći w Budyšinje zemrěł. Mikławš Žur je jako młody Administrator – po tym zo bě w lětach 1887/1888 Křižnu cyrkej, kiž bě tehdy w dezolatnym stawje, sporjedźeć a ponowić dał – Radworčanow přeswědčił wo trěbnosći nowotwara cyrkwje město porjedźenja stareje. Wón je tutón rozsud z cyrkwinskimi radźićelemi a wjesnjanostu njedźiwajcy pjenježnych wobmyslenjow dnja 18.07.1888 doskónčnje přetłóčił. Je ze swojimi sobuwojowarjemi w oktobrje 1889 collatora, rabiju Clemensa von Einsiedela za twar zdobył tak, zo je wosada wot tutoho samo bjezpłatnje ležownosć za cyrkej darjenu dóstała. Po njeskónčnje wjele wojowanjach a rozestajenjach wo pjenjezy, architekturu a přiměrjenosć tajkeje cyrkwje je wšitko za spočatk twara w lěće 1894 (fundamenty) a 1895 (hłowne dźěła) spřihotował. W aprylu lěta 1894 bu wot Radworja wotwołany a jako kapłan při dwórskej cyrkwi w Drježdźanach postajeny. Ćerpješe pod tym jara, kaž jednomu přećelej napisa. Přičina za wotwołanje bě hłownje jeho njesměrny, haj z časami zasakły bój wo nowu cyrkej a přesadźenje swojich předstawow – z čimž bě sej tójšto přećiwnikow w cyrkwi kaž tež w statnych instancach sčinił. Tola w septembru lěta 1896 wróći so – nětko jako farar – a dotwari cyrkej, tak zo móžeše so dnja 15. nowembra 1896 swjatočnje wot biskopa Ludwiga Wahla woswjećić. W slědowacych lětach wupyši cyrkej, da wołtarnišćo wumolować a dari cyrkwi wulku postawu swj. Mikławša, kiž steji na lěwej stronje před wołtarnišćom. W nowembru 1903 bu za naslědnika fararja Skale při Serbskej cyrkwi w Budyšinje zwołany. Tak njesprócniwje a angažowanje kaž w Radworju dźěłaše tež w Budyšinje a zdoby sebi wulku česćownosć a připóznaće ze cyrkwinskich a statnych stron. W lěće 1908 bu wón tachantski knjez, mało měsacow po tym powyšichu jeho na konsistorialneho asesora, bu šolastikus, “kantor” a “senior” w tachantstwje. Při znowa załoženju Mišnjanskeho biskopstwa 1921 bu za domjaceho prelata tehdomneho bamža Benedikta XV. pomjenowany. Ze statneje strony so jeho zasłužby 1913 z Albrechtowym rjadom I. rjadownje počesćichu. W běhu lět sta so z generalnym prokuratorom tachantstwa a bu oficial Mišnjanskeho biskopstwa. Tute zastojnstwo, połne zamołwitosće, kaž tež hišće zastojnstwo kustosa biskopskeje cyrkwje, je z wulkej swědomitosću a bjez-přikładnej dypkliwosću wukonjał, doniž jeho chorosć na łožo njesputa. Dnja 15.12.1932 jeho Bóh na prawdu Božu wotwoła. Pohrjebany bu na Budyskim Mikławšku – a tam zaspěwa jemu tež Radworska Hudźbna Jednota (Meja) pod nawodom Michała Nawki jako wěčny dźak, za wšitko to, štož je njeboćički za Radwor činił. |
15.12.1932_n.sauer_gestorben.1679754598.txt.gz · Zuletzt geändert: 2023/03/25 14:29 von admin
Seiten-Werkzeuge
Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: CC Attribution-Share Alike 4.0 International
